الرئيسية » أخبار عاجلة » بتدور على شغل جديد .. لازم تقرأ الكلام دا

بتدور على شغل جديد .. لازم تقرأ الكلام دا

وظائف خاليةسعد البحيري

البحث عن وظيفة أمر مش سهل عشان كدا لما تبعت السيرة الذاتية لمكان طالب موظفين لازم تاخد بالك من شوية حاجات

  • لازم تكون مقتنع ان قدراتك وامكانياتك تناسب الوظيفة مش اي وظيفة ترمي لهم السي في بتاعك وتقول يا صابت يا خابت.

  • لازم تكتب خطاب تعريفي مختصر بجوار السيرة الذاتية لا تكتفي بارسال ملف وورد او بي دي اف من غير ما تقدم نفسك بشكل كويس.

  • يفضل تبعت السي في وورد مش بي دي اف مش كل الناس عندها اكروبات ريدر ع جهازها ممكن كمان يفتحها ع الموبيل.

  • بلاش السي في الطويلة اختصر ع قد ما تقدر ركزع الانجازات اللي عملتها في حياتك الوظيفية.

  • اكتب شاركت في كذا وحققت كذا لما كنت باشتغل في المكان الفلاني دا بيدي امل انك شخص مختلف

  • في الخطاب التعريفي ح تكتب اسمك ومؤهلك وانت شوفت الاعلان فين واي وظيفة انت متقدم لها.

  • لما تكتب خطاب لجهة اوعى تنسخة وتبعته لجهة تانية من غير ما تراجعه لانك ح تكون كاتب اسم الوظيفة ومكان الاعلان القديم.

  • كلامك في الخطاب المرفق مع السيرة لازم يكون محسوب لانه بيتم تقييمك من خلاله وبناء عليه ح يقرر صاحب الاعلان يشوف السيرة بتاعتك والا لأ.

  • لما يكون الاعلان عن الوظيفة عربي ابعت سيرتك بالعربي بلاش فذلكة احنا عارفين انك ناقلها من مكتب السايبر اللي جنب البيت.

  • لما يكون الاعلان انجليزي ابعت السي في بالانجليزي يعني خاطب كل واحد بلغته.

  • ابعد عن موضوع “الاوبجيكتفز” اللي مالي السيفيهات دا واكتب مهاراتك وقدراتك اللي تملكها بالفعل .. احنا عارفين هي منقولة منين.

  • اوعي تتخيل نفسك سوبر مان وتكتب مهارات وخبرات مش حقيقية لأن دا ممكن يخليك “اوفر كواليفايد” يعني اسم النبي حارسك وصاينك قدراتك أكبر من الوظيفة .. تواضع شوية.

  • لما تبعت السي في “إحياة أبوك يا شيخ ” ابئي شقر ع الميل بتاعك كل ساعة لأنهم ممكن يردوا عليك بلاش التقل دا.

  • بلاش تكتب ارقام 3 موبايلات او 4 اللي انت شايلهم عارفينك راجل مهم اكتب بس رقم واحد بيكون في ايدك دايما وبترد عليه وبطاريته مشحونة.

  • لما تقدم على وظيفة ويجي لك اتصال من رقم غريب ما تعملش فيها عبده المهم وتقول مش ح أرد على ارقام غريبة لان ممكن يكونوا انطسوا في نظرهم وقبلوا يشغلوك.

  • لما تكون شروط الوظيفة معلنة ما تروحش المقابلة طالما هي مش مناسبة ليك لان صعب شغل يغير ظروفة لتوافق ظروف موظف تحت الاختبار.

  • لما تروح المقابلة الشخصية روح بدري شوية اعمل حساب المواصلات والزحمة وبلاش الشعبطة في الاوتوبيس اركب ميكروباص او خد تاكسي ابيض عشان توصل بكرامتك.

  • لما تدخل ع المدير اللي ح يقابلك ما تكتفش نفسك وكأنك قاعد إدام مأذون خد راحتك في القعدة بس مش أوي يعني.

  • بلاش تفرك ايدك في بعضها او تعرق ولو عندك افراط في العرق يفضل تستعمل اي كريم موضعي قبل المقابلة.

  • ريحة العرق مش محتاجة اقول لك عليها ح تكون اول سبب لعدم قبولك في الشغل.

  • بالنسبة للبنات ركزي في لبسك وما تزوديهاش اوي في المكياج انت رايحة مكان عمل مش نايت كلوب.

  • لما تقعد في الانترفيو يا تتكلم عربي يا تتكلم انجليزي بلاش الفذلكة بكام كلمة اللي انت عارفهم من ايام اعدادي .

  • لما يسالك عن المرتب المتوقع خليك ناصح اوعي تضربها فوق وتغلي نفسك او تقول اللي تدفعوه يا تقول رقم معقول يا تسيب لهم التقييم .

  • وانت خارج من المقابلة ما تنساش تسلم ع المدير اللي قابلك سلام دبلوماسيين بهز الايد مرتين ع الاقل وتمشي بدون ما تخبط في الكراسي .

  • اذا اشتغلت خليك فاكر ان انا السبب بالنصايح دي

Related posts:

  1. أحمد حلمى كان لازم نغضب وننزل وتيسير فهمى لانريد فرعون جديد
  2. عاجل|منصور يصدر اعلانا دستوريا يكلف لجنة الخمسين بصياغة دستور جديد
  3. نادية طاهر تكتب: الصمت هو العلم الأصعب من الكلام

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>